اپنے جینے کے ہم اسباب دِکھاتے ہیں تمہیں
دوستو! آؤ کہ کچھ خواب دکھاتے ہیں تمہیں
تم نے غرقاب سفینے تو بہت دیکھے ہیں
سر پٹکتے ہوئے سیلاب دکھاتے ہیں تمہیں
حسن کا شور جو برپا ہے، ذرا تھمنے دو
عشق کا لہجۂ نایاب دکھاتے ہیں تمہیں
میرے پھیلے ہوئے دامن کے کبھی ساتھ چلو
منہ چھپاتے ہوئے احباب دکھاتے ہیں تمہیں
چھت پہ آ جاؤ ہر اک کام سے فارغ ہو کر
چاندنی رات کے محراب دکھاتے ہیں تمہیں
کیسے آنکھوں میں اترتے ہیں لہو کے قطرے
کیسے بنتا ہے یہ تیزاب، دکھاتے ہیں تمہیں
تم ذرا پیاس کی معراج کو پہنچو تو سہی
ریگزاروں میں بھی گرداب دکھاتے ہیں تمہیں
سلیم صدیقی
No comments:
Post a Comment