ہجر کا غم بھی نہیں وصل کی پروا بھی نہیں

 ہجر کا غم بھی نہیں وصل کی پروا بھی نہیں

دل بھی پہلو میں نہیں دل کی تمنا بھی نہیں

نہیں درکار نہیں مجھ کو غمِ چارۂ غم

ہاں میں دیوانہ ہوں بے شک مگر اتنا بھی نہیں

تم نہ شرماؤ نہ گھبراؤ میں کہتا بھی ہوں کچھ

ذکرِ وعدہ بھی نہیں، خواہشِ ایفا بھی نہیں

جوششِ گریہ اک اعجاز ہے ورنہ دلِ زار

آخر اک بوند ہے، بادل نہیں دریا بھی نہیں

بے خودی حشر میں کیا یاد دلاؤں گا اسے

خود مجھے یاد اب اس شوخ کا وعدہ بھی نہیں

وقتِ پُرسش ہے ابھی فرصتِ احساں ہے ابھی

آئیے میں ابھی زندہ بھی ہوں اچھا بھی نہیں

اب کہاں لذتِ احساسِ ترقی مانی

یاس میں جزر و مدِ دردِ تمنا بھی نہیں

مانی جائسی