دیکھ کر اٹھتا ہوا شوق کا سر یعنی تو

 دیکھ کر اُٹھتا ہوا شوق کا سر یعنی تُو

کاٹ ڈالے گا مِرا دستِ ہنر یعنی تو

بیج میرا تھا مگر شاخِ ثمر پر تیرا ہاتھ

کہیں ہوتا ہے سرِ شاخِ شجر یعنی تو

کوئی منزل کی خبر دیتا ہے یعنی کوئی

اور بنتا ہے مِری راہ گزر یعنی تو

آئینہ عکس کی حیرت میں سمٹ جاتا ہے

ہے تصور میں کوئی آئینہ گر یعنی تو

باندھ دیتا ہے مِرے پاؤں میں زنجیر نئی

مجھ کو جانے نہیں دیتا مِرے گھر یعنی تو

اے نبیل ایک سفر اور کرے گا کب تک

کب تک آخر یہ سفر ایک سفر یعنی تو

نبیل احمد