میں جانتا ہوں سبھی مسئلوں کا حل پگلی
تُو صرف ہاتھ پکڑ اور ساتھ چل پگلی
ہمارے جیسے غلاموں کا کیا ہے جی لیں گے
تمہیں اداس کریں گے یہ مورچھل پگلی
یہ کس کا ہجر لکھا ہے تمہارے ماتھے پر
یہ کس کے وصل نے ڈالے ہیں اتنے بل پگلی
کسی کے خواب مریں گے، کسی کے مہکیں گے
کسی کی آنکھ سمندر، کسی کی تھل پگلی
یہ خود کلامی کی عادت تِری نئی نئی ہے
تُو کس خیال کے تابع ہے آج کل پگلی
اری یہ عشق کی رڑکن ہے، جانے والی نہیں
مزید اشک بہیں گے، نہ آنکھ مَل پگلی
یہ خوش لباس بدن کھوکھلے ہیں جذبوں سے
سراب ہیں جو نظر آ رہے ہیں جل پگلی
قضا، خدا نے محبت میں رکھی ہے ہی نہیں
نماز پڑھ لے کہ سورج نہ جائے ڈھل پگلی
آزاد حسین آزاد
No comments:
Post a Comment