کہا تھا کس نے کہ مقبول ہو دعائے بہار
نہ تم ہو ساتھ مِرے اور چلے ہوائے بہار
اثر ہر ایک پہ کرنے لگی ادائے بہار
کِھلے وہ پھول وہ چلنے لگی ہوائے بہار
ہمارے زخمِ جِگر خود بخود ہرے ہوتے
اگر نہ ہوتی زمانے میں ابتدائے بہار
خِزاں سے پہلے ہی بلبل کی موت کیا معنی
خدا نہ زِیست میں دِکھلائے انتہائے بہار
قریب بیٹھنے پر یوں خفا ہوئے ہم سے
اب آؤ خیر دِکھا دیں تمہیں فضائے بہار
سُنا ہے رنج میں ہیں آج حضرتِ عالم
نظر ہے جانبِ ساغر زباں پہ ہائے بہار
عالم لکھنوی
No comments:
Post a Comment