سن کے سینے میں ترا سانس اٹک سکتا ہے

 سن کے سینے میں تِرا سانس اٹک سکتا ہے

وہ ہے اک مرد محبت سے بھی تھک سکتا ہے

غصہ کرنے کی اجازت ہے فقط بابا کو

تُو مجھے صرف محبت سے ہی تک سکتا ہے

تجھ سے بچھڑی تو یہ دنیا کہاں مرنے دے گی

تیرا کیا ہے تُو تو پنکھے سے لٹک سکتا ہے

دے نہیں سکتا کبھی گالی بھی اچھا شاعر

وہ تو غصے میں بھی اک شعر ہی بک سکتا ہے

اپنی نیندوں کا پتہ اس کو بتا کر سونا

وہ نیا خواب ہے رستہ بھی بھٹک سکتا ہے

میرے لفظوں پہ جو حاوی ہے تِرے ہجر کا رنگ

میری غزلوں میں فقط درد جھلک سکتا ہے

ناہید اختر بلوچ