عطائے ذوالجلال ہے تو پیکر جمال ہے

 حور

عطائے ذوالجلال ہے

تُو پیکرِ جمال ہے

کُھلی ہوئی کتاب ہے

تُو حسنِ بے حجاب ہے

شگفتگی ہے پھول کی

تُو اُمتی رسولؐ کی

یہ گل نشین تتلیاں

یہ دل فریب مستیاں

یہ سرمگیں سی روشنی

یہ چاندنی سی تیرگی

بہت شریر سادگی

کبھی اداس زندگی

تِری غلام، شوخیاں

کہ زرخرید باندیاں

رواں ہے آبشار سی

حسیں ہے خوابشار سی

ہے نور نور ہر گلی

مہک رہی کلی کلی

طمانیت لحاف کی

پری ہے کوہ قاف کی

تُو انتہا یقین کی

مہک ہے یاسمین کی

تُو میرجا کی صاحبہ

عفیف ایک راہبہ

بھلا سا تیرا روپ ہے

تُو سردیوں کی دھوپ ہے

نگاہ سیر آب ہو

جو محو، یہ سراب ہو

مچل رہی جوانیاں

کہ پک گئیں خوبانیاں

جوان ایک خواب ہے

حسین اک گلاب ہے

دھنک میں تیرا رنگ ہے

فضاؤں میں امنگ ہے

تُو مثل ہے زبور کی

شعاع ایک نور کی

خدا کا معجزہ ہے تُو

مِرے لیے بنا ہے تُو

تُو آسماں کا نیل ہے

سفر حسیں، طویل ہے

تُو لے ہے ایک گیت کی

تُو اک خوشی ہے جیت کی

ملائمت ہے روئی کی

مثال چھوئی موئی کی

نگاہ کا سرور ہے

خداؤں کا غرور ہے

قیاس سے قرین ہے

تو حسن آفرین ہے

تُو حور آسمان کی

لوچ ہے کمان کی

خواجہ ثقلین