اے اہل جور و اہل جفا تم تو کچھ کہو

 اے اہلِ جور و اہلِ جفا تم تو کچھ کہو

ہم کہہ چکے حدیثِ وفا تم تو کچھ کہو

منہ تک رہا ہے حکمِ سزا تم تو کچھ کہو

کیا تم بھی ہو گئے ہو خفا تم تو کچھ کہو

زنداں سے پھر پکار رہے ہیں کسی کو ہم

تم بھی تو سن رہے ہو صدا تم تو کچھ کہو

آواز کس کو دیں کہ زمانہ خموش ہے

ہم بن چکے ہیں کوہِ ندا تم تو کچھ کہو

رہبر اُداس اُداس ہیں راہیں خموش ہیں

اے رہروانِ آبلہ پا تم تو کچھ کہو

بادِ لطیف و کُنج چمن ماہِ نیم ماہ

کچھ کہہ رہی ہے آب و ہوا تم تو کچھ کہو

سر تھا وبالِ دوش، سبکدوش ہو گئے

کم ہے یہ آگہی کا صِلا تم تو کچھ کہو

تجدیدِ رسمِ عشق وفا دشمنوں کے ساتھ

خالد برا کیا کہ بھلا تم تو کچھ کہو

خالد علیگ