دریا پیار کا سوکھ گیا تو شہر یہ چولستان ہوا

 دریا پیار کا سُوکھ گیا تو شہر یہ چولستان ہوا

آندھی ایسی ہجر کی اُٹھی باغ بھی ریگستان ہوا

جن پر آتے جاتے ہم کو چاندنی راتوں نے دیکھا

سُونا سُونا وہ پنگھٹ ہے،۔ رستہ وہ سُنسان ہوا

مانا کہ کچھ طاق نہیں ہو پائے دنیاداری میں

کتنے دُکھ کی بات ہے لیکن عشق میں بھی نقصان ہوا

ہنستے بستے گھر کے آنگن میں ہریالی آنی تھی

وقت نے دُھول اڑائی، اپنا خواب نگر ویران ہوا

گئے زمانے کے فرسودہ، گِھسے پٹے افسانے ہیں

جاناں تُو بے کار وفا کے چکر میں ہلکان ہوا

تھوڑی دیر رُکا، سستایا اور پھر اپنی راہ لگا

دل کیا ایک سرائے تھا کہ ہر کوئی مہمان ہوا

جس بے درد نے اکثر ہم کو ٹھیس بہت پہنچائی تھی

فردا جب برباد ہوئے ہم،۔ کتنا وہ حیران ہوا

صائمہ آفتاب