اگرچہ قطرہ ہوں اور بحر سے جدا بھی نہیں

اگرچہ قطرہ ہوں اور بحر سے جدا بھی نہیں

مگر یہ کیا ہے کہ میں بحر آشنا بھی نہیں

یہ جستجو تِری لائی ہے کس جگہ مجھ کو

یہاں تو کوئی تِرا صورت آشنا بھی نہیں

الٰہی کس کا سہارہ وفورِ ضعف میں لوں

لبوں پہ اب تو مِرے آہِ نا رسا بھی نہیں

نہ کارواں کا پتہ ہے نہ رہرواں کا نشاں

عجب ہے راہِ عدم جس میں نقشِ پا بھی نہیں

خیالِ یار ہی خضرِ رہِ محبت ہے

نہ چھوٹ جائے تو کوئی رہنما بھی نہیں

عروسِ دہر دکھاتی ہے کیوں جمال مجھے

مِرے جنوں کو تو اس بُت سے واسطہ بھی نہیں

وحشی کانپوری