کس لیے پوچھتے ہیں جبکہ سبب جانتے ہیں

 کس لیے پوچھتے ہیں جبکہ سبب جانتے ہیں

لوگ جو حالِ دلِ چارہ طلب جانتے ہیں

کس کی لو ٹھہرتی ہے کون سے بجھتے ہیں چراغ

ہم نقیبانِ ہوا، سب کے نسب جانتے ہیں

آشنا لاکھ ملیں تجھ سے قریں بھی ہوں بہت

جاننے والے بھی اے دل! تجھے کب جانتے ہیں

کس کے دھوکے میں رہیں منتظر خواب حسیں

ہم بھی سادہ ہیں، کہاں مہلتِ شب جانتے ہیں

سایہ تک رکھتے ہیں ملحوظ دبستانِ وفا

آنکھ اٹھائیں بھی تو آداب و ادب جانتے ہیں

کون کٹھ پتلی ہے، ایوان تماشا کس کا؟

پسِ پردہ تو حقیقت یہاں سب جانتے ہیں

حمزہ ہاشمی سوز