دُکھے دل کو ہنسانا چاہتی ہوں
میں سب کے کام آنا چاہتی ہوں
نہیں ہے کوئی جن کا اس جہاں میں
میں ان کے دکھ بٹانا چاہتی ہوں
وہ زمانہ جنہیں بُھلا بیٹھا
گلے ان کو لگانا چاہتی ہوں
جُز محبت نہیں کہیں کچھ بھی
یہ دُنیا کو بتانا چاہتی ہوں
چراغ ان نفرتوں کی بستیوں میں
محبت کے جلانا چاہتی ہوں
نکل آئے کسی کی آنکھ سے جو
میں وہ آنسو چُرانا چاہتی ہوں
بہت رنجور ہیں جو ان کی خاطر
میں شازی مُسکرانا چاہتی ہوں
شازیہ عالم شازی
No comments:
Post a Comment