ہراساں آپ کو کرنا ہے احتیاط کے ساتھ
فصیلِ جاں سے گزرنا ہے احتیاط کے ساتھ
گئے دنوں میں تو عُجلت نے مار ڈالا تھا
نئے دنوں میں سُدھرنا ہے احتیاط کے ساتھ
نہ داغدار ہو جائے تمہاری چوکھٹ بھی
یہاں پہ سر کو بھی دھرنا ہے احتیاط کے ساتھ
فلک پہ سوئے ستارے نہ جاگ جائیں کہیں
ہمیں زمیں پہ اترنا ہے احتیاط کے ساتھ
ہماری کرچیاں تاریخ کو نہ چبھ جائیں
بکھرنا ہے تو بکھرنا ہے احتیاط کے ساتھ
تمہارے ہجر کا راقب یہ پہلا ہدیہ ہے
سو اشک آنکھ میں بھرنا ہے احتیاط کے ساتھ
امیر عباس راقب
No comments:
Post a Comment