ذرا سی دیر کو چمکا تھا وہ ستارہ کہیں

 ذرا سی دیر کو چمکا تھا وہ ستارہ کہیں

ٹھہر گیا ہے نظر میں وہی نظارہ کہیں

کہیں کو کھینچ رہی ہے کشش زمانے کی

بلا رہا ہے تری آنکھ کا اشارہ کہیں

یہ لہر بہر جو ملتی ہے ہر طرف دل میں

بدل گیا ہی نہ ہو زندگی کا دھارہ کہیں

یہ سوچ کر بھی تو اس سے نباہ ہو نہ سکا

کسی سے ہو بھی سکا ہے مرا گزارہ کہیں

رواں دواں رہو ہر چند آفتاب حسین

دکھائی دیتا نہیں دور تک کنارہ کہیں

آفتاب حسین