کچھ کرب کا باعث ہے نہ بنیاد طرب ہے

 کچھ کرب کا باعث ہے نہ بنیادِ طرب ہے

جینے کی کوئی شکل نہ مرنے کا سبب ہے

یہ کیسی ہوسناک قناعت ہے خدایا 

جو تارکِ دنیا ہے وہ فردوس طلب ہے

جس دنیا کے رہنے کا گماں تک نہیں رہنا

اس دنیا میں میں رہ جانے کی حسرت بھی عجب ہے

اک خواب کہ دورانِ دوام اس میں ادھورا

اور نیند کی مدت سے سوا عرصہؑ شب ہے

اے میری جسارت کا قدم ناپنے والے

معلوم تجھے رقبۂ اقلیمِ ادب ہے

اے فرقِ تمنا و طلب جاننے والے

بس جان کہ تو میری تمنا کی طلب ہے

ایمان کی اس خانہ خرابی کا یقیں کر

پہلے کوئی رہتا تھا یہاں پر کہ جو اب ہے

تُو بھوک میں جیتے ہوئے بندوں کا خدا ہے

تُو عیش میں دم توڑتے لوگوں کا بھی رب ہے

سید مبارک شاہ ہمدانی