تیرے رخسار کو گلنار کیا کرتی ہے

 تیرے رخسار کو گلنار کیا کرتی ہے

کتنا پُر کیف ستم سرد ہوا کرتی ہے

جب بھی گلشن میں کلی پھول ہوا کرتی ہے

اس کی تشہیر فقط باد صبا کرتی ہے

کیوں اسی زخم کو ناسور کیا کرتی ہے

اے مِری عمرِ گزشتہ تو یہ کیا کرتی ہے

آس پتھر بنی اک دل میں بسا کرتی ہے

راہ اپنے کسی آذر کی تکا کرتی ہے

لوگ کیا جانیں، دھنک یوں بھی کیا کرتی ہے

رنگ سارے تِرے آنچل سے لیا کرتی ہے

نغمگی، آپ کی گفتار کی سبحان اللہ

بانسری، جیسے کہیں دور بجا کرتی ہے

منحصر،رنگتیں ہوتی ہے رتوں پر یوں تو

مفلسی ہی کی مگر زرد ہوا کرتی ہے

تُو ہی باندھے ہوئے رکھتا ہے خیالوں میں مجھے

خلق تو قید پرندوں کو رہا کرتی ہے

فصلِ گل حوصلہ دیتی ہے، جنوں کو آ کر

اور خرد چاک گریباں کو سِیا کرتی ہے

یاد کیوں شب کے دھندلکوں سے نکل کر اس کی

دل کے دروزے پہ دستک سی دیا کرتی ہے

خواجہ ثقلین