اس کرم کا کروں شکر کیسے ادا

عارفانہ کلام نعتیہ کلام

اس کرم کا کروں شکر کیسے ادا جو کرم مجھ پہ میرے نبیﷺ کر دیا

میں سجاتا تھا سرکارؐ کی محفلیں مجھ کو ہر غم سے رب نے بری کر دیا

ذکر سرکارﷺ کی ہیں بڑی برکتیں، مل گئیں راحتیں، عظمتیں، رفعتیں

میں گنہ گار تھا، بے عمل تھا مگر مصطفٰیﷺ نے مجھے جنتی کر دیا

لمحہ لمحہ ہے مجھ پر نبیﷺ کی عطا دوستو اور مانگوں میں مولا سے کیا

کیا یہ کم ہے کہ میرے خدا نے مجھے اپنے محبوبﷺ کا امتی کر دیا

جو بھی آیا ہے محفل میں سرکارﷺ کی حاضری مل گئی جس کو دربارﷺ کی

کوئی صدیقؓ فاروقؓ عثمانؓ ہوا اور کسی کو نبیﷺ نے علیؓ کر دیا

جو در مصطفٰیﷺ کے گدا ہو گئے دیکھتے دیکھتے کیا سے کیا ہو گئے

ایسی چشم کرم کی ہے سرکارﷺ نے دونوں عالم میں ان کو غنی کردیا

کوئی مایوس لوٹا نہ دربار سے جو بھی مانگا ملا میری سرکارﷺ سے

صدقے جاؤں نیازی میں لج پال کے ہر گدا کو سخی نے سخی کر دیا

عبدالستار نیازی