اشک دامن میں گرا ہو جیسے

 اشک دامن میں گِرا ہو جیسے

اک نیا زخم لگا ہو جیسے

پھر کوئی ٹِیس اٹھی ہے دل میں

پھر کوئی پھول کِھلا ہو جیسے

خواب ٹُوٹا تو شور اتنا تھا

آئینہ ٹُوٹ گیا ہو جیسے

کچھ دنوں سے سکون ہے ایسے

دردِ الفت میں مزا ہو جیسے

دیکھنا بے رُخی سے یوں مجھ کو

اب تلک مجھ سے خفا ہو جیسے

جب بھی مِلتا تھا ایسے مِلتا تھا

آخری بار مِلا ہو جیسے

کوئی جھونکا سا چُھو کے گُزرا ہے

تِرے دامن کی ہوا ہو جیسے

ہائے غمگینئ صبحِ گلشن

پُھول خُوشبُو سے خفا ہو جیسے

پِچھلی راتوں سے ترے ہجر کا دُکھ

میری پلکوں پہ ٹکا ہو جیسے

آئینہ دیکھ لوں تو لگتا ہے

رنگ چہرے کا اُڑا ہو جیسے

کتنی خاموشیاں ہیں سینے میں

دِل سے دھڑکن بھی جُدا ہو جیسے

پاؤں لگتے نہیں زمین سے یوں

کوئی کانٹا سا چُبھا ہو جیسے

حسرتیں چِیختی ہیں یوں دل میں

کہیں ماتم کی صدا ہو جیسے

مِری ناکامیوں سے لگتا ہے

مِرا انجام بُرا ہو جیسے

اس طرح میں نے کاٹ لی شاہد

زِیست کانٹوں کی رِدا ہو جیسے

شاہد مرزا