غم حیات سے فرصت ہمیں کبھی نہ ملی

غمِ حیات سے فرصت ہمیں کبھی نہ ملی

خوشی کے نام کو سنتے رہے خوشی نہ ملی

اسی کے دل سے کوئی اس کی تشنگی پوچھے

کہ مے کدے میں جسے ایک بوند بھی نہ ملی

میں جس طرف بھی جہاں میں گیا خوشی کے لیے

مجھے تو غم کے علاوہ کہیں خوشی نہ ملی

کبھی کبھی یہ جلانے کے بعد دیکھا ہے

مِرے چراغ سے خود مجھ کو روشنی نہ ملی

جو ان کے سامنے بے اختیار آئی تھی

پھر آج تک مِرے ہونٹوں کو وہ ہنسی نہ ملی

لگا لیا غمِ دوراں نے پھر کلیجے سے

غمِ حیات کے ماروں کو جب خوشی نہ ملی

مِرا مزاج زمانے نے لاکھ اپنایا

مِرے مزاج کی ایسی تو سادگی نہ ملی

وہ اور ہیں کہ جو لطفِ حیات اٹھاتے ہیں

کمال موت بھی مجھ کو ہنسی خوشی نہ ملی

کمال لکھنوی

سید غلام عباس