ہر بام و در پہ یوں تو مچلتی ہے روشنی
کترا کے میرے گھر سے نکلتی ہے روشنی
مایوسیوں کی زد پہ ہے امید کی کرن
ٹلتی ہے غم کی رات نہ ڈھلتی ہے روشنی
بزمِ جہاں کے رنگ ہیں سورج سے مستعار
غازہ رخِ حیات پہ ملتی ہے روشنی
اک محشرِ صدا ہے خلاؤں میں عکس ریز
لہروں میں کروٹیں سی بدلتی ہے روشنی
ساحل سے دیکھ شوخئ عکسِ مہِ تمام
موجوں کے ساتھ ساتھ اچھلتی ہے روشنی
اللہ،۔ ان ضدوں کو شعورِ جمال دے
ملتے ہیں ذہن و دل تو نکلتی ہے روشنی
حزیں صدیقی
No comments:
Post a Comment