تعبیر کی قیمت تو چکائے نہ بنے ہے

 تعبیر کی قیمت تو چُکائے نہ بنے ہے

آنکھوں سے مگر خواب مٹائے نہ بنے ہے

تم ہو کہ ہر ایک بات میں سو بات کرو ہو

ہم سے تو کوئی بات بنائے نہ بنے ہے

کمبخت میرا دل بھی تو حساس بہت ہے

اپنوں سے کوئی لو بھی لگائے نہ بنے ہے

کردار نہ گر جائیں زمانے کی نظر سے

یہ سوچ کے افسانے سنائے نہ بنے ہے

اشکوں کا سمندر بھی کھڑا سوچ رہا ہے

"وہ آگ لگی ہے کہ بجھائے نہ بنے ہے"

یہ کیسی محبت ہے میری، تشنہ لبی سے

دریا میں ہوں اور پیاس بجھائے نہ بنے ہے

اے وحشت دل! دیکھ، مِرے ہاتھ بندھے ہیں

صحرا میں بھی اب خاک اڑائے نہ بنے ہے

حسن امام رضوی