عارفانہ کلام حمد نعت منقبت
پناہ مانگو
حرم کے سجدہ گزارو
اپنی خفیف پیشانیاں زمینِ حرم پہ رکھ دو
تڑپ کے روتے ہوئے دلوں کو
حجاز کے ہر قدم پہ رکھ دو
دعا کرو، گڑگڑاؤ، بِلکو
کہو کہ ربِ بزرگ و برتر
ہماری رسوائیوں کی زد سے
حریمِ کعبہ کو تُو بچا لے
ہماری کوتاہیوں پہ
بیت الحرم کی حُرمت کو مت نگوں کر
خدائے برتر، خدائے برتر
دیار حرماں کے بے قراروں کو معاف کر دے
شکستِ حُرمت کے سوگواروں سے درگزر کر
خدائے برتر، خدائے برتر
حرم کے سجدہ گزارو
اپنی خفیف پیشانیاں زمینِ حرم پہ رکھ دو
لرزتے ہونٹوں، بلکتے دل سے
خدائے غفار کو پکارو
لہو فشاں چشمِ تر کو اپنی
نبیﷺ کے نقشِ قدم پہ رکھ دو
حرم کے سجدہ گزارو اٹھو، پناہ مانگو
خدائے رحمٰن و ربِ اکرم کی
شفقتوں کی پناہ مانگو
بغاوتوں، سرکشی اور عصیاں پر
مغفرت کی پناہ مانگو
حرم کے سجدہ گزارو اٹھو
پناہ مانگو، پناہ مانگو
احمد حاطب صدیقی
No comments:
Post a Comment