مرا کلام فقط روزنامچہ نہیں تھا

 مِرا کلام فقط روزنامچہ نہیں تھا

اسے کلام سے کچھ بھی تو واسطہ نہیں تھا

یہ کیسی رسمِ محبت تمہارے شہر میں تھی

کہ جس میں دل کا کوئی بھی معاملہ نہیں تھا

تمہارا دل تو سرائے تھا دل نہیں تھا اے دوست

مسافر آئے کہ جائے مناقشہ نہیں تھا

شکستہ شہر تھا بچنا تھا کس طرح اس نے

کہ اس کے گرد وفا کا محاصرہ نہیں تھا

یہ تم جو پوچھ رہے ہو کہ مجھ کو کیا غم ہے

یہ دل کا ٹوٹنا گویا کہ حادثہ نہیں تھا

میں اس کو شہرِ کم آزار کس طرح لکھتا

شکستِ دل کا جہاں کوئی ضابطہ نہیں تھا

میں ان ستاروں کے نحس و سعد کو مانتا نئیں

سو میرے ہاتھ میں کوئی بھی زائچہ نہیں تھا

یہ راہِ عشق بھی اشکر تھی کوئی بند سی گلی

کہ واپسی کا کوئی بھی تو راستہ نہیں تھا

اشکر فاروقی