رنج رائیگانی میں عمر بھی بتانی ہے

 بے قیمت

زندگی تو ان کی ہے

بس تمہیں جن آنکھوں کو دستیاب رہنا ہے

زندگی تو ان کی ہے

جن کی دسترس میں ہو

جن سے بات کرتی ہو

جب سوال کرتے ہیں، تو جواب ملتا ہے

زندگی تو ان کی ہے

جن کو فخر حاصل ہے

تم سے روٹھ سکتے ہیں، یا تمہیں مناتے ہیں

اور اک طرف ہم ہیں

یا ہمارے جیسے ہیں

دیکھ بھی نہیں سکتے

بات اک طرف ٹھہری

پوچھ  بھی نہیں سکتے

خود سے روٹھ لیتے ہیں، خود ہی مان جاتے ہیں

رنجِ رائیگانی ہے

اور ایسی حالت میں عمر بھی بِتانی ہے

عبدالوہاب عبدل