رنگ پیراہن تو خوشبو زلف لہرانا تِرا

 رنگ پیراہن، تو خُوشبو زُلف لہرانا تِرا

فصلِ گُل بھی ہے اچانک بام پر آنا ترا

ساقیا اس چشم کی کچھ تو بتا جس کے بِنا

گُل ہوا بے رنگ، خالی ہے یہ پیمانہ ترا

چشم نم ہے، پھول مہکے اور شمعیں جل اٹھیں

یاد آیا دفعتاً کیوں رُوٹھ کر جانا ترا

دلبری نے پِھر زبانِ خلق کُھلوا دی یہاں

ورنہ کِس کو یاد آتا زُلف بکھرانا ترا

اب جو وہ اقرارِ محبوبی نہیں لیلیٰ کو بھی

کس قدر بدنام ہے اے حسن! دیوانہ ترا

آج خوش ہو کر رقیبوں نے دیا کیا کیا تجھے

رِند ہے، ساقی ہے، خم ہے، مے ہے، میخانہ ترا

قلبِ ویراں اب تو کہتا ہے یہ تجھ سے رات دِن

خوش خرامی کے لیے ہو اور ویرانہ ترا

تجھ کو اس سے ہے تقاضائے وفا کیا سوچ کر

تھا کبھی جو آشنا اب ہے یہ بے گانا ترا

فیض یہ بزمِ سخن ہے کیا کہے بے کل تجھے

عمر رفتہ کا اثاثہ ہے یہ افسانہ ترا

عبدالرزاق بے کل