کام بگڑا تھا مرا جو بھی بنایا تو نے

 عارفانہ کلام حمد نعت منقبت

کام بگڑا تھا مِرا جو بھی بنایا تُو نے

میرے مولیٰ مجھے ہر آن سنبھالا تو نے

جان پتھر میں پلی اس کو کھلایا تو نے

وہیل مچھلی کو سمندر میں ہے پالا تو نے

آسماں اور یہ زمیں سب ہے بنایا تو نے

ایک میزان سے پھر سب کو چلایا تو نے

پھول کانٹوں میں محبت کا کھلایا تو نے

کتنا رنگین گلستاں یہ سجایا تو نے

امتی ہم کو محمدﷺ کا بنایا تو نے

اور ایمان کی دولت سے نوازا تو نے

گل کے سینے میں بھی خوشبو کو بسایا تو نے

سیپ کی کوکھ میں موتی کو چھپایا تو نے

جو مِرے حق میں تھا بہتر وہ بنایا تو نے

اس طرح میرے مقدر کو سنوارا تو نے

تھا میں غفلت میں مجھے خوب جگایا تو نے

مجھ کو آئینۂ اسلام دکھایا تو نے

پوجتا پیڑ یا پتھر کسی مندر میں سراج

یہ کرم تیرا کہ مسجد میں بلایا تو نے

سراج الدین گلاؤٹھوی