یہ سبز باغ دکھا نہ ادھر ادھر کے مجھے

 یہ سبز باغ دکھا نہ اِدھر اُدھر کے مجھے

رٹے ہوئے ہیں پہاڑے اگر مگر کے مجھے

وہ چاہتا ہے شکایت نہ ہو مِرے لب پر

بھری بہار کی رُت میں اداس کر کے مجھے

میں اس لیے رہِ غم میں سنبھل نہیں پائی

فریب دیتا ہے ہر بار وہ نظر کے مجھے

زمین زادے تِرے ہوش میں اڑا دوں گی

ذرا دکھا تو سہی تُو بھی اب مُکر کے مجھے

میں ایک دشتِ محبت سے ہو کے آئی ہوں

یہ عارضے نہیں یوں ہی لگے جگر کے مجھے

یہ آسماں کے ستارے مجھے بلاتے ہیں

پیام آنے لگے روز اب قمر کے مجھے

میں جانتی ہوں محبت کے سب فریبوں کو

تُو کیا سکھائے گا رستے یہاں ہنر کے مجھے

شبِ فراق میں جب سوچتی ہوں میں مریم

وہ یاد آتا ہے دل میں ٹھہر ٹھہر کے مجھے

مریم ناز