اے ستارہ نسب تِری آنکھیں
اے مسیحائے شب تری آنکھیں
جیسے شوال ہو تِرا ماتھا
جیسے ماہِ رجب تری آنکھیں
جیسے تلوار ہوں بھنویں تیری
روح عین العرب تری آنکھیں
بے بصارت بھی سننے لگتے ہیں
بات کرتی ہیں جب تری آنکھیں
حسن عالم کی کیا کروں تعریف
سب تِرے ہونٹ سب تری آنکھیں
میرے منظر ہیں اب تِرے منظر
میری آ نکھیں ہیں اب تری آنکھیں
غیر ممکن ہے ملتی جلتی مثال
اس قدر ہیں عجب تری آنکھیں
چلتا پھرتا ہے مے کدہ اکرام
تیری آنکھیں ہیں کب تری آنکھیں
اکرام عارفی
No comments:
Post a Comment