تیرے آنے سے ہی گلرنگ ہوئی ہے یہ زمیں

 تیرے آنے سے ہی گُلرنگ ہوئی ہے یہ زمیں

ایسا لگتا ہے کہ میں ہوں ترے ہونے سے یہیں

تِتلیاں رنگ چُراتی ہیں بتاتی ہیں مجھے

تیرے ہونے کا گُماں اور ترے ہونے کا یقیں

میں جنہیں چھوڑ کے آیا تھا تمہاری خاطر

جانے کس حال میں رہتے ہیں اسی گھر کے مکیں

بےوجہ خواب بُنیں کس لیے آنکھیں میچیں

جس نے آنا ہو وہ آ جائے گا اک روز یہیں

سمتِ افلاک اڑی جاتی ہے کوئی خواہش

دیکھنا لوٹ نہ آئے وہ مرے پاس کہیں

میں وہ رفتارِ جنوں خیز جو ہنستا جاؤں

 تیری وسعت کو خبر کیا مِرے اے دشتِ حزیں

فتح کرنا ہے ہمیں عشق کا میدان، سو ہم

ساتھ لے جائیں گے وہ لوگ جو گھبرائیں نہیں

سر بہ سجدہ تِرے ہونے کی گواہی دیں گے

جتنے اِترائے ہوئے لوگ ہیں اے ماہ جبیں

زاہد خان