عارفانہ کلام حمد نعت منقبت سلام
بندگی یوں بھی ہوئی رات کی تنہائی میں
میں نے اک نعت لکھی رات کی تنہائی میں
میرے سرکارؐ نے کیا مجھ پہ کرم فرمایا
دل کی آواز سنی رات کی تنہائی میں
یوں گُہر باری ہوئی یادِ مدینہ میں کہ بس
آنکھ بہتی ہی رہی رات کی تنہائی میں
جس کو لے کر گئے قدسی بھی بصد ناز و نعم
ایسی اک مالا جپی رات کی تنہائی میں
خندَۂ صبح ملے عشقِ بلالیؓ و صہیبؓ
اور ملے جذبِ قرنیؒ رات کی تنہائی میں
پیش کی درد سے بوصیری کے جیسے اک نعت
اور مِری بگڑی بنی رات کی تنہائی میں
یوں بھی فریاد نے آغوشِ اجابت پایا
غیبی تحسین ملی رات کی تنہائی میں
گنبدِ خضریٰ کے جلوؤں نے اثر ایسا کیا
زندگی سبز ہوئی رات کی تنہائی میں
ہجر کے پودے عطا سارے اڑا ہی ڈالے
صر صرِ وصل چلی رات کی تنہائی میں
عطا اشرفی
No comments:
Post a Comment