ہوں منسٹر مستند ہے میرا فرمایا ہوا

 زعفرانی غزل

منکہ ایک منسٹر ہوں

مرغیوں پر بھی کر سکتا ہوں اظہارِ خیال

اورسانڈوں پر بھی ہوں محفل میں سرگرمِ مقال

ریس کے گھوڑوں پہ بھی تقریر کر سکتا ہوں میں

اکبر و اقبال کی تفسیر کر سکتا ہوں میں

ہومیوپیتھک ہو یا دندان سازی کا کمال

باغبانی ہو کہ ہو رومی و رازی کا کمال

بات پھولوں کی ہو یا قومی ترانے کا بیاں

چاٹ ہو بارہ مسالے کی، کہ ہو اردو زبان

بو علی سینا کی حکمت، بات افلاطون کی

ایگری کلچر ہو یا شِق ہو کوئی قانون کی

داغ کا دیوان ہو یا ہو وہ ایٹم بم کا راز

ماہی گیری ہو کہ ربط و ضبطِ محمود و ایاز

مسئلہ تاریخ کا یا مبحثہ ہو علم کا

فلسفہ گلقند کا ہو یا ہو قصّہ فلم کا 

کشتۂ فولاد ہو یا شربتِ دینار ہو

بے ضروری سب پہ میری رائے کا اظہار ہو

"مدّعا عنقا ہے اپنے عالمِ تقریر کا"

شوق ہے دل میں مگر قرآن کی تفسیر کا

جتنے بھی شعبے ہیں، میں ان سب پہ ہوں چھایا ہوا

ہوں منسٹر مستند ہے میرا فرمایا ہوا

مجید لاہوری