چشمِ عشاق میں نمناکئ وحشت رہ جائے
جاں چلی جائے مگر عشق سے نسبت رہ جائے
خوابِ آوارہ کی تکمیل تو ہو گی لیکن
کہیں ایسا نہ ہو پھر وا درِ ہجرت رہ جائے
ہم سے سرزد ہو اچانک کوئی ایسی غلطی
لڑکھڑا جائیں قدم تھوڑی مسافت رہ جائے
کس کے گھر جائے گی بے چہرگئ تہمتِ عشق
زندہ رہنے کے لیے بارِ ملامت رہ جائے
یہ زمیں تنگ نہیں پھر بھی ضروری ہے بہت
خاکساروں کے لیے خانۂ عبرت رہ جائے
لب پہ ہے شکوۂ ناقدرئ اہلِ نظراں
کیسے ممکن ہے دستار سلامت رہ جائے
بے یقینی نہ ہو تو پھر ہو وہاں کیا شاداب
جہاں رشتے نہ رہیں صرف ضرورت رہ جائے
شاداب احسانی
No comments:
Post a Comment