محوِ یادِ خُدا رہا کیجے
عِجز سے زندگی جِیا کیجے
مُسکرانا بھی ایک صدقہ ہے
دیکھ کر مُسکرا لیا کیجے
مجھ کو اپنی انا سے لڑنا ہے
میری خاطر دُعا کیا کیجے
دل مرمت کا کام ہے میرا
آئیے مجھ سے رابطہ کیجے
مُشکلوں کے ہے ساتھ آسانی
رنج پہنچے تو پھر سہا کیجے
آپ کا دل سکون پائے گا
غمزدوں سے گَلے ملا کیجے
آپ اپنا حساب بھی دیں گے
ساتھ اپنے بھی کچھ وفا کیجے
رب کرے آپ خوش رہیں ہر دم
سُکھ ملے یا غمی ہنسا کیجے
ایک کونے میں کیوں پڑے رہنا
اچھی صحبت میں جا لیا کیجے
اس طرح پیار اور بڑھتا ہے
مُسکرا کر گلے لگا کیجے
یہ نشانی ہے ایک مومن کی
آئے غصہ تو پھر پیا کیجے
آپ من کی مراد پائیں گے
ذکر صلِّ علی کیا کیجے
وقت رہتا نہیں کبھی اک سا
سرد آئے تو حوصلہ کیجے
حل کرے گا وہ آپ کی مُشکل
رب کے آگے جُھکیں، صدا کیجے
جلوتوں میں محبتیں بانٹیں
خلوتوں میں خدا خدا کیجے
رات سونے سے قبل بستر پر
آپ اپنا محاسبہ کیجے
آپ کے مال پر ہے حق ان کا
مُفلسوں کا بھی حق ادا کیجے
کون بھُوکا ہے کون ننگا ہے
دُکھ پڑوسی کا بھی پتا کیجے
آپ لِلّہ جانیے خود کو
خلوتوں میں مراقبہ کیجے
دُنیا والوں کی تلخ باتوں پر
آپ بس مُسکرا دیا کیجے
سلمان خاور
سلمان منیر احمد خاور
No comments:
Post a Comment