میں نے تو ظلم جان پہ کیا کیا نہیں کیا

 عارفانہ کلام حمد نعت منقبت

میں نے تو ظلم جان پہ کیا کیا نہیں کیا

لیکن مِرے حضورﷺ نے رُسوا نہیں کیا

مجھ کو یقیں ہے لاج رکھیں گے وہ روزِ حشر

یا پھر کہو حضورﷺ نے وعدہ نہیں کیا

اب تک کوئی بھی ڈھونڈ کے لایا نہ وہ سوال

جس کو مِرے حضورﷺ نے پورا نہیں کیا

وہ فیض بھی حضورﷺ کے صدقے عطا ہوئے

جس کا کبھی کسی نے تقاضا نہیں کیا

اپنوں میں یا کہ غیروں میں لاؤ اگر ہے کوئی

رحمت کا جس پہ آپﷺ نے سایہ نہیں کیا

انجم یہ تجھ پہ لطف وکرم پھر حضورﷺ کا

تُو نے تو کوئی کام بھی اچھا نہیں کیا

عبدالرحمٰن انجم