شہداء و غازیانِ پاکستان کو خراجِ تحسین
شہید جیت گئے شہسوار جیت گئے
شہید جیت گئے شہسوار جیت گئے
دیار پاک! تِرے جاں نثار جیت گئے
وفائیں تیرے لیے اے مراد جانْبازاں
تِرے جمال کے آئینہ دار جیت گئے
خزاں کی باد مخالف نے جن کو چھیڑا تھا
وہ تیرے سبز نشاں، اے بہار جیت گئے
فضا نورد، تِرے چھا گئے فضائوں پر
تِرے جوان، سرِ کارزار جیت گئے
حریمِ عظمتِ اقبال تجھ کو مُژدہ ہو
کہ تیرے لوگ، تِرے نامدار جیت گئے
وفا ہے معجزہ جسم و جاں سو کام آئی
ہجوم ہار گیا، کم شمار جیت گئے
بنا ہے خون جگر مُژدۂ فروغ سحر
تپیدگانِ شبِ انتظار جیت گئے
دلوں کو تیرا سہارا بڑا سہارا تھا
غرور ہار گیا، خاکسار جیت گئے
فضا فضا ہے یہ نغمہ، نوا نوا یہ صدا
فدائیان سرِ کُوئے یار جیت گئے
مزار قائداعظمؒ تجھے مبارک ہو
ہمارے شہر، ہمارے دیار جیت گئے
ہوں تیری آن کے قربان، عاشقوں کے ہجوم
تِرے نثار، تِرے جاں نثار جیت گئے
جون ایلیا
No comments:
Post a Comment