بتوں سے ڈرتا رہا ہوں خدا کے ہوتے ہوئے

 بُتوں سے ڈرتا رہا ہوں خُدا کے ہوتے ہوئے

سو مُشکلوں میں ہوں مُشکل کُشا کے ہوتے ہوئے

کہاں کہاں نہیں سجدے مِری جبیں نے کیے

میں در بدر پھرا حاجت روا کے ہوتے ہوئے

مِرا یزید کی بیعت بغیر چارہ نہ تھا

در حسینؑ کے اور کربلا کے ہوتے ہوئے

یہ لا الہٰ کی شمع ہے، یوں جلے گی نہیں

حدودِ دل میں کسی دیوتا کے ہوتے ہوئے

یہ تیز تیز دھڑکتا ہوا مِرا دل ہے 

میں حوصلے میں نہیں  نا خُدا کے ہوتے ہوئے

خُدا کسی کو بھی وہ دل کبھی عطا نہ کرے

جو نا اُمید ہو روز جزا کے ہوتے ہوئے

مِرا عدُو مجھے بے دست و پا سمجھتا رہا

میں خالی ہاتھ نہیں تھا دُعا کے ہوتے ہوئے

یہ کیفیت مِرے باہر نہیں تھی، اندر تھی

عجیب حبس تھا آب و ہوا کے ہوتے ہوئے

کوئی کمی تو بہر کیف تھی مِرے اندر

میں بے نوا تھا ، توانا صدا کے ہوتے ہوئے

لہو جگر کا جلانے کی دیر ہے ان میں 

مِرے چراغ جلیں گے ہوا کے ہوتے ہوئے

علمدار حسین نقوی