تو رب کائنات ہے خلاق دو جہاں

 عارفانہ کلام حمد نعت منقبت

تُو رب کائنات ہے خلّاق دو جہاں

یکتا ہے اور یگانہ ہے ثانی تِرا کہاں

شاہد ہر ایک سانس ہے تیرے وجود کی

شہ رگ سے تُو قریب ہے بے وہم بے گماں

میری بساط کیاہے جو تیری ثنا کروں

عاجز اگر قلم ہے تو مجبور ہے زباں

گھائل نہ کوئی میری زبان و قلم سے ہو

ہونے نہ پائے مجھ سے کبھی کوئی بد گماں

حاصل مِرے قلم کو ہو رنگینئ سخن

میری زبان کو ہو عطا قوت بیاں

پیشِ نظر ہو نزع میں صورت رسول کی

آنکھوں کی راہ نکلے مِری جانِ نا تواں

روزِ حساب بخش دے آزاد کو خدا

تُو رحمتِ تمام ہے، تُو سب کا مہرباں

آزاد ساحری