حسرت و ارماں دلِ ناشاد کیا
آرزو اے خانماں برباد! کیا
کشتۂ بے داد مجبورِ وفا
بھُولنے والے ہماری یاد کیا
گوشِ گُل تک بھی رسا ہوتی نہیں
بُلبلِ ناشاد کی فریاد کیا
کر دئیے جب قطع پر صیّاد نے
مرغ پھر پابند کیا، آزاد کیا
مُبتلائے گردشِ دوراں ہوں میں
داستانِ آشیاں برباد کیا
صفحۂ قرطاس پر دل کے نقوش
کھینچ سکتے مانی و بہزاد کیا
یاد کر کے ہو رہے ہو کیوں ملول
آ گئیں میری وفائیں یاد کیا
جاں بہ لب ہے تشنۂ دیدار عیش
وعدۂ لا یخلف المیعاد کیا
عیش میرٹھی
No comments:
Post a Comment