عارفانہ کلام حمد نعت منقبت
دربارِ تجلّی میں
اللہ تیرا نام، غفور و رحیم تُو
مالک کل عالمین کا، رب کریم تُو
ہر ایک بیل بُوٹے پہ لکھا ہے تیرا نام
رقصاں ہے تیری ذات سے یہ زندگی کا جام
تیرے ہی رنگ و نُور سے ہے رونقِ حیات
تیری ہی دُھن پہ رقص میں ہے ساری کائنات
تُو نے زمیں پہ کیسے گُلستاں کھلا دئیے
عرشِ بریں پہ چاند ستارے سجا دئیے
تیرے کرم کی حد ہے نہ کوئی حساب ہے
مستوں کو جس نے مست کیا وہ شراب ہے
پوشیدہ ہے نگاہ سے، زیرِ نقاب ہے
ہر سُو کُھلا ہوا تِری رحمت کا باب ہے
خالق بھی تُو ہے، مالکِ کون و مکاں بھی تُو
تُو ہی زمیں ہے، تُو ہی خلا، آسماں بھی تُو
انساں کو بخش دے تُو محبت کی روشنی
کر دے مِری زمیں کو عطا امن و آشتی
صادقہ فاطمی
No comments:
Post a Comment