دشمن جاں ہے جان محفل بھی

 دشمنِ جاں ہے جانِ محفل بھی

وہ مسیحا نفس بھی، قاتل بھی

آ تو پہنچے تھے ہم بھی ساحل پر

راس آیا ہمیں نہ ساحل بھی

شامِ غم! انتظار میں تیرے

ہوش کیسا تھا، کھو گیا دل بھی

تم نہیں آئے جو کبھی سرِ بام

رہ گیا بُجھ کے ماہِ کامل بھی

جذبۂ دل سے کچھ توقع تھی

کام آیا نہ جذبۂ دل بھی

ہر عطا ہے عطائے خاص ان کی

آبِ حیواں بھی، زہرِ قاتل بھی

اک یہی دل ہے مقصدِ تخلیق

اک یہی دل ہے نقشِ باطل بھی

جامِ خوشرنگ دیکھنے والو

دیدنی ہے یہ خوں شدہ دل بھی

رہ نوردانِ راہِ دل احمر

مضطرب ہیں قریبِ منزل بھی

احمر رفاعی

ڈاکٹر احمد حسین احمر