مستقل محرومیوں پر بھی دل تو مانا نہیں

مستقل محرومیوں پر بھی دل تو مانا نہیں

لاکھ سمجھایا کہ اس محفل میں اب جانا نہیں

خود فریبی ہی سہی، کیا کیجیے دل کا علاج

تُو نظر پھیرے تو ہم سمجھیں کہ پہچانا نہیں

ایک دنیا منتظر ہے، اور تیری بزم میں

اس طرح بیٹھے ہیں ہم جیسے کہیں جانا نہیں

جی میں جو آتی ہے کر گزرو، کہیں ایسا نہ ہو

کل پشیماں ہو کہ کیوں دل کا کہا مانا نہیں

زندگی پر اِس سے بڑھ کر طنز کیا ہو گا فرازؔ

اس کا یہ کہنا کہ تُو شاعر ہے، دیوانہ نہیں

احمد فراز