محبت کو چھپانا آ گیا ہے

محبت کو چھپانا آ گیا ہے

خود اپنا دل دکھانا آ گیا ہے

فسانے میں حقیقت جب سے آئی

حقیقت میں فسانہ آ گیا ہے

سیاست میں قدم جیسے بڑھایا

مِرے پیچھے زمانہ آ گیا ہے

لٹا میرا نشیمن ساتھ دل کے

تمہارا آشیانہ آ گیا ہے

ہماری زندگی دکھ کا سمندر

یہ ہونٹوں پر ترانہ آ گیا ہے

خدا اس کو صدا آباد رکھے

اسے بھی چوٹ کھانا آ گیا ہے

تھپیڑے غم کے سہتے سہتے رخشاںؔ

تمہیں بھی مسکرانا آ گیا ہے

رخشاں ہاشمی