جس کو اک پھول سے بھی پیار نہیں

 جس کو اک پھول سے بھی پیار نہیں

زندہ رہنے کا سزاوار نہیں

وقت کے ساتھ میں کیونکر نہ چلوں 

میرے بس میں مِری رفتار نہیں

میری تدبیر ہے رزاق میری

کچھ بھی تقدیر سے درکار نہیں

موت کی وجہ بتا دے کوئی

مجھ کو جینے پہ تو اصرار نہیں

کس نے خورشید کو محبوس کیا

دور تک صبح کے آثار نہیں

جھانکتا رہتا ہوں مستقبل میں 

دھند میں کچھ بھی نمودار نہیں

وہ بھی تو مجھ سا ہے آدم زادہ 

میں تو دشمن سے بھی بیزار نہیں

اس کے اعمال ہیں شاہد کہ ندیمؔ

صرف کافر ہے، گنہ گار نہ

احمد ندیم قاسمی