حال دل سب سے چھپانے میں مزا آتا ہے

حال دل سب سے چھپانے میں مزہ آتا ہے

آپ پوچھیں تو بتانے میں مزہ آتا ہے

روشنی بوجھ سی لگتی ہے شب ہجراں میں

ہاں مگر دل کو جلانے میں مزہ آتا ہے

جسکے کچھ تار الجھ جاتے ہیں دل کی صورت

بس اسی ساز پہ گانے میں مزہ آتا ہے

جاں بچانے کا "تصور" بھی برا لگتا ہے

عشق میں جان گنوانے میں مزہ آتا ہے

یاد کر کر کے وہ گرمی کی بھری دوپہریں

پہلی بارش میں نہانے میں مزہ آتا ہے

نواز دیوبندی