اگرچہ تو فقط اپنی طرف ہے

 اگرچہ تُو فقط اپنی طرف ہے

گُماں سب کو ہے کہ ان کی طرف ہے

ہے اک جانب خدا اک سمت میں ہوں

بتا اے شخص! تُو کس کی طرف ہے

خدا کی بندی! تم کیوں ڈر رہی ہو

خدا خود بھی محبت کی طرف ہے

میں جس کو تھوڑا تھوڑا دیکھتا ہوں

مِرا سارا دھیاں اس کی طرف ہے

میں کس امید پر انصاف مانگوں

زمانہ بھی تمہاری ہی طرف ہے

مِرے اشعار گو سب کے لیے ہیں

اشارہ پر مِرا تیری طرف ہے

میں سچ کی راہ پر جو گامزن ہوں

سو ہر آفت کا رخ میری طرف ہے

جو اپنی بھی طرف دانش نہیں ہے

مزے کی بات وہ تیری طرف ہے

اعجاز دانش