کیا شہر میں ہے گرمئ بازار کے سوا

 کیا شہر میں ہے گرمئ بازار کے سوا

سب اجنبی ہیں ایک دلِ زار کے سوا

اس دشتِ بیخودی میں کہ دنیا کہیں جسے

غافل سبھی ہیں اک نِگۂ یار کے سوا

چہروں کے چاند راکھ ہوئے بام بجھ گئے

کچھ بھی بچا نہ حسرتِ دیدار کے سوا

عالم تمام تیرگئ دردِ مضمحل

ہاں اک فروغِ شعلۂ رخسار کے سوا

ساری شفق سمیٹ کے سورج چلا گیا

اب کیا رہا ہے موجِ شبِ تار کے سوا

جس سمت دیکھیے ہے صلیبوں کی اک قطار

کوئی افق نہیں افقِ دار کے سوا

انور صدیقی