جب آہ بھی چپ ہو تو یہ صحرائی کرے کیا

 جب آہ بھی چپ ہو تو یہ صحرائی کرے کیا 

سر پھوڑے نہ خود سے تو یہ تنہائی کرے کیا 

گزری جو ادھر سے تو گھٹن سے یہ مرے گی 

حبسِ دلِ وحشی میں یہ پُروائی کرے کیا 

کہتی ہے جو کہنے دو یہ دنیا مجھے کیا ہے 

زندانئ احساس میں رسوائی کرے کیا

 ہر حسن و ادا دھنس گئے آئینے کے اندر

جب راکھ ہوں آنکھیں تو یہ زیبائی کرے کیا

وہ زخم کہ ہر لمس نیا زخم لگے ہے

بیمارئ ادراک مسیحائی کرے کیا

پل بھر کو یہ سودائے جنوں کم نہیں ہوتا

شہروں کے تکلف میں یہ سودائی کرے کیا

ثروت زہرا