سچ سمجھ کر تِرے بیانوں کو
ہاتھ چُھونے لگے ہیں کانوں کو
اپنے ایقان کی دراڑوں میں
آؤ بھرتے ہیں کچھ گُمانوں کو
ایک درویش اپنے کاسے میں
ڈال کر چل دیا زمانوں کو
ہاتھ رکھے رہے نکیلوں پر
لے گئے اونٹ ساربانوں کو
میں وہاں بِن بلائے جاتا ہوں
آپ سنتے رہیں اذانوں کو
ایک کھڑکی کھٹکتی رہتی ہے
اُس گلی کے سبھی مکانوں کو
پھر ملاقات ٹل گئی لیکن
شرم آنے لگی بہانوں کو
قہر پھُوٹے گا ہر بُنِ مُو سے
کاٹ دو گے اگر زبانوں کو
اسد رحمان
No comments:
Post a Comment