آوارگی میں چین کے لمحات مسترد

 آوارگی میں چین کے لمحات مسترد

یعنی کہ دِینِ عشق میں بدعات مسترد

دی جا رہی تھی چھین کے دُوجے فقیر سے

کر دی تِرے فقیر نے خیرات مسترد

جاہل کے خواب پر بھی یقیں کر رہے ہیں لوگ

عالم کے ہو رہے ہیں مقالات مسترد

اک دائرے کو راستہ سمجھے ہوئے ہے وہ

سو رہنما کی ساری ہدایات مسترد

ہیں کچھ کتابِ عشق کے اپنے بھی ضابطے

شیطان پڑھ رہا ہو تو آیات مسترد

کیسی گھٹن ہے ان میں کہ گوتم سے قیس تک

کرتے ہیں شاہ زاد محلات مسترد

دہشت، جنون، قتل، جہالت، خدا گری

دَیر و حرم کی جملہ خرافات مسترد

مجھ سے کہا گیا تھا کہ اوقات میں رہو

اور میں نے کی ہے اپنی یہ اوقات مسترد

لوگوں نے اپنے مسئلے سمجھے تو ہو گئیں 

جہل و جنوں پہ مبنی رسومات مسترد

ایسے تو بات ہو ہی نہیں پائے گی ناں دوست

تُو کر رہا ہے جیسے ہر اک بات مسترد

چھُو کر یقیں دِلا مجھے ایسا نہ ہو کہیں

کر دے تجھے بھی علمِ طبیعات مسترد

تیری زباں کی باگ تِرے ہاتھ میں نہیں

اے شاہ! تیرا حکم، تِری بات مسترد

ایمان لا رہا ہوں میں خود ہی پہ صبح و شام

خود ہی کو کر رہا ہوں میں دن رات مسترد

شعیب کیانی