پھیلتا جاتا ہے دریا کا کنارہ کافی
میری مٹی ابھی سہنا ہے خسارہ کافی
کُھل کے ہوتی نہیں ہر بات بتانے والی
صاحبِ فہم کو ہوتا ہے اِشارہ کافی
کہکشاؤں پہ تسلط کی ہوس میں گُم ہے
ذرۂ خاک کو تھا ایک ستارہ کافی
اور بھر لیں گے اب اس جسم میں کتنی سانسیں
پہلے ہی پُھول چکا ہے یہ غبارہ کافی
فاصلے بڑھتے گئے عمر کی رفتار کے ساتھ
ورنہ غیروں کو بھی لگتا تھا میں پیارا کافی
ذکر اذکار،۔ بدل لمس کا کب تھے، لیکن
ڈوبنے والے کو تنکے کا سہارا کافی
کوئی امید بھی ہو ہاتھ پکڑنے والی
بچ نکلنے کو نہیں صرف کنارہ کافی
خوش قدم ہو کے بھی کیا تجھ سے تقابل ہوتا
باقی چلنے کو ہے ٹوٹا یہ سہارا کافی
حملہ آور ہوئے غم صورت لشکر، لیکن
ضبط کا صرف رہا ایک ہی نعرہ کافی
کچھ بھی سُننے نہ دیا شورِ گماں نے احمد
ایک امکان بچارے نے پکارا کافی
حبیب احمد
No comments:
Post a Comment